Dr Alex isch syt emene Joor Witlig – trotzdäm ass är si manglet, kunnt är ganz guet zrächt. Är het e spannende Bruef, sy Dochter Sara samt Familie und sy Änggelkind kemme reegelmäässig z Bsuech und haitere iin uff… är macht alles rächt.

Aber denn: D Julia, die bescht Frindin vo syner Frau sälig konfrontiert iin mit em letschte Wunsch vo dr Evelin: Är soll – är muess wiider hyroote! Und si het iim no zue Läbzytte grad drey Kandidatinne ussgsuecht. Geege si Wille muess är sich also, uff Befääl vo dr Julia – und speeter sogar uff Befääl vo dr Evelin sälber (!) – mit de drey Daame verabreede. Do wird derno scho – lut Evelin – die rächti derby syy.

Und denn drampe die drey Versuechige ins Lääbe vom Alex: Diana, Deborah und Heidi – aini schlimmer as die ander fir sy gaischtigi und kerperligi Gsundhait – dr blutt Waansinn!

Dr Alex erläbbt ai Katastroophe no dr andere – und s Bublikum e wunderbari Kumeedi voll Witz und Charme.